ភ្នំពេញ៖ ក្រៅពីរាជរដ្ឋាភិបាលសាងសង់វិមានឈ្នះឈ្នះនៅរាជធានីភ្នំពេញ រាជរដ្ឋាភិបាលបានកំពុងសាងសង់ស្តូបអនុស្សារីយ៍នយោបាយឈ្នះឈ្នះនៅតាមខេត្តមួយចំនួនដែលជាទីតាំងប្រវតិ្តសាស្ត្រដើម្បីជាតឹកតាងសម្រាប់ឱ្យយុវជនជំនាន់ក្រោយបានសិក្សារៀនសូត្រ។

រដ្ឋមន្ត្រីក្រសួងការពារជាតិ បានគូសបញ្ជាក់ឱ្យដឹងបែបនេះក្នុងពិធីខួបទី២៥ឆ្នាំនៃការបញ្ចប់សង្គ្រាមស៊ីវិល និងខួបទី៥ឆ្នាំ នៃវិមានឈ្នះឈ្នះ នាព្រឹថ្ងៃទី២៩ ខែធ្នូ ឆ្នាំ២០២៣ ក្រោមអធិបតីភាពនាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត។

បើតាមឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នាយឧត្តមសេនីយ៍ ទៀ សីហា ការសាងសង់ស្តូបអនុស្សារីយ៍នយោបាយឈ្នះឈ្នះនៅខេត្តកោះកុងសម្រេចបាន ១០០ភាគរយ ខណៈនៅខេត្តឧត្តរមានជ័យសម្រេចបាន ៨០ភាគរយ ដោយឡែកនៅខេត្តប៉ៃលិនសម្រេចបាន ៧៧ភាគរយ។

នាយឧត្តមសេនីយ៍ ទៀ សីហា បានលើកឡើងថា ក្រសួងការពារជាតិនឹងជំរុញ និងពន្លឿនការសាងសង់ស្តូបអនុស្សារីយ៍នយោបាយឈ្នះឈ្នះនៅស្រុកអន្លង់វែង ខេត្តឧត្តរមានជ័យ និងប៉ៃលិនឱ្យសម្រេចតាមផែនការដែលបានគ្រោងទុក។

នាយឧត្តមសេនីយ៍ ទៀ សីហា បានបញ្ជាក់ដែរ រាជរដ្ឋាភិបាលនឹងបន្តកសាងស្តូបអនុស្សាវរីយ៍នយោបាយឈ្នះឈ្នះនៅទីតាំងប្រវត្តិសាស្ត្រដទៃទៀតដើម្បីចារឹកទុក តម្កល់និមិត្តរូប វត្ថុតាង និងសមិទ្ធផលនានាដែលជាថ្នាល់បណ្តុះអ្នកមនសិការសុខុម និងការចូលរួម និងជាមេរៀនសម្រាប់មនុស្សជំនាន់ក្រោយឱ្យចងចាំ រៀនសូត្រ និងគោរពដឹងគុណសម្តេចតេជោ ហ៊ុន សែន ស្ថានិកមគ្គុទេ្ទសក៍ឯក និងប្រតិបត្តិករនយោបាយឈ្នះឈ្នះដែលនាំមកនូវសន្តិភាព និងឯករាជ្យជាតិពេញលេញ ព្រមទាំងការចងចាំយុទ្ធជនដែលស្នេហាជាតិដែលបានធ្វើពលីកម្មប្រកបដោយវីវភាពដើម្បីជាតិមាតុភូមិ។

ជាមួយគ្នានេះ ក្រសួងការពារជាតិក៏មានគម្រោងសាងសង់សួនតេជោសន្តិភាពនៅតាមបណ្តាខេត្តផងដែរ ដើម្បីរំលឹកគុណដល់អ្នកដឹកនាំដែលនាំមកនូវសុខសន្តិភាពនៅកម្ពុជា។

បន្ថែមពីនេះ ក្រសួងការពារជាតិនឹងបន្តផ្សព្វផ្សាយនយោបាយឈ្នះឈ្នះជូនដល់មន្ត្រីរាជការ កងកម្លាំងប្រដាប់អាវុធ សិស្សានុសិស្ស ប្រជាជន និងមហាជន ជាពិសេសយុវជនជំនាន់ក្រោយយល់កាន់តែច្បាស់នូវអត្ថន័យនយោបាយឈ្នះឈ្នះដែលជាមូលដ្ឋានគ្រឹះធំបំផុតធានាបាននូវចរីភាព សន្តិភាព ស្ថេរភាព សន្តិសុខ សណ្តាប់ធ្នាប់សង្គម ប្រទេសជាតិមានការរីកចម្រើនរុងរឿងស្មើមុខស្មើមាត់ប្រទេសជាតិដទៃ។

គូសបញ្ជាក់ថា ស្តូបអនុស្សាវរីយ៍នយោបាយឈ្នះឈ្នះ សាងសង់ឡើងតាមគំរូប្លង់គោលមានឃឿន ៤ជ្រុង សរុប ៦៦ម៉ែត្រ កម្ពស់ ៤៣ម៉ែត្រ ហើយទីធ្លា បរិវេណស្តូបអនុស្សាយ៍នយោ បាយឈ្នះឈ្នះ មានទំហំធំទូលាយក្នុងការចតរថយន្ត និងសម្រាប់ទទួលទេសចរមកកម្សាន្ត៕